Como mestra de Pedagoxía Terapéutica dei apoio a dous alumnos de 4º de Educación Infantil:
- Un alumno con necesidades específicas de apoio educativo asociadas a retraso psicomotor severo (parálise cerebral).
- Un alumno con necesidades específicas de apoio educativo asociadas a Trastorno do Espectro Autista (TEA).
O apoio realizouse dentro da aula, o obxectivo primordial foi a integración destes alumnos favorecendo a súa participación o mais activa posible. Traballáronse aspectos relacionados coa: coordinación motriz tanto grosa como fina; a capacidade de predición e a anticipación dos acontecementos; habilidades comunicativas e habilidades sociais e de relación con outros nenos a través do xogo.
Solicitouse o uso dunha Tablet ao CFR de Vigo para traballar os seguintes obxectivos:
- Realizar actividades de motricidade fina que potencien e maximicen as posibilidades de manipulación.
- Manipular e recoñecer e diferentes obxectos e imaxes.
- Manter a atención na tarefa que realiza durante un pequeno espazo de tempo.
- Coñecer e acceder ás novas tecnoloxías da información e da comunicación.
- Participar de forma activa nas actividades lúdicas cos seus compañeiros.
O uso da Tablet foi un gran aliado para a consecución destes obxectivos. Foi un elemento moi motivador tanto para eles como para o resto do grupo.
As apps que se utilizaron foron:
"Debuxos para nenos!" é un xogo que ofrece aos nenos a oportunidade de crear e explorar o proceso creativo das artes visuais. Os nenos poden debuxar atractivos personaxes, como unha bolboreta, unha ra, un coche e moitos outros obxectos. Todos os debuxos cobran vida unha vez que se termina de debuxalos.
Coa App # Soyvisual pódense traballar diferentes actividades interactivas para o desenvolvemento da linguaxe, permitindo unha aprendizaxe autónoma, adaptado ao propio ritmo do neno. Inicialmente, descargáronse tres paquetes de exercicios para traballar a morfosintaxe e construción de frases cos verbos: comer, beber e cheirar de Nivel 1 (Suxeito - Verbo - Complemento Directo). Progresivamente poderíanse descargar novos paquetes de maior nivel, para máis verbos e para traballar outras áreas da linguaxe ( semántica, pragmática,...).
José Aprende é unha colección de contos adaptados a pictogramas para aprender o proceso de AUTOCUIDADOS (aseo persoal), de RUTINAS (situacións cotiás) e de EMOCIÓNS (contento, triste, asustado…).
Conclusión: O resultado foi moi positivo por proporcionarlle aos nenos unhas experiencias de aprendizaxe a través dunha contorna lúdica que as enriquece. Ademais, foi unha ponte que facilitou a interacción dos alumnos con necesidades educativas especiais co resto dos seus compañeiros ao participar en grupos pequenos realizando este tipo de actividades.
REFLEXIÓN:
Grazas ás tablets, os nenos amplían as súas experiencias a través de sons, imaxes, e todo tipo de xogos de contido lúdico. Incorporar as tablets no proceso de ensino-aprendizaxe con alumnos de infantil con parálise cerebral e con autismo son un importante método de estímulo para eles. Ao ser unha tecnoloxía táctil facilita a accesibilidade e é unha ferramenta que proporciona un realismo e un feed- back inmediato. Con todo, non podemos pensar que o uso en se dunha tablet vai producir un efecto terapeútico nun alumno. Senón que debe ser supervisado o seu uso por profesionais e situarse dentro dun programa integral de intervención educativa.
